Our contributor, Mark Martinez, is a Speech Communications graduate of UP Baguio. On his free time he writes prose and poetry in three languages: English, Tagalog and Ilocano. He is a freelance journalist and currently dabbles in photography.

Ubing ak pay lang idi pimmanaw ni manang ko
Napan jay Amerika ta pinitisyunan ni apong ko
Narigat kano ditoy isu nga ijay nga agbirok ti trabaho
Ijay na nga ikurri tay BS Nursing na nga kurso

Imbati na tay lakay na nga isu met ti bayaw ko
Maysa a tricycle driver tay naasawa ni manang ko
Plinano da nga mapan met ijay ni manong Pilo
Ngem madi met makaala-ala Visa tapno makasaruno

Adda ti anak da nga lalaki ti timmao
Dimmakkel tay kaanakak nga awan ti ina na nga mangisuro
Disisaisen tay ubing, tattan ket bumaro
Nasursuro nan ti arak, sigarilyo, ken naduma-duma pay a bisyo

Ado ti nagbaliwen manipod di nag-abroad ni manang ko
Ado met ti nasurutan nan nga madi tay piman a bayaw ko
Awanen tay singpet nan nga naayatan da tatang ko
Sugal, bulang, arak, babae– napirdin ni bayaw ko

Nakadanon kenni manang ko tay napasamak a kanito
Nasaktan nakem na ta naanakan ni manong jay kabit na nga bisyo
Atay baro na ket madin nga matukkol jay sara na nga timmubo
Nakunsumisyon, nagsakit– nagbalin a de-baterya tay puso ni
manang ko

Anyan a rigat ti sukat ti panagadayo
Agpayso nga ado ti kwarta ngem ni lakay na met ket nagloko
Dakes nga anak, napaturay a sakit ti ulo
Nu agbalikbayan ni manang ko, madi nga agkonswelo

Ado ti namnama di nakadanon California ni manang ko
Naragsak isuna idi nga umiliw jay pamilya na nga binuo
Limmabas ti mano a tawen nga bimmaliw; nangindulto
Napukaw tay ragsak ken namnama, nasukatan ti sakit a pudno

Maminsan nga nakatungtong ko ni manang ko
Dinamag ko panagbiag na jay Amerika no kasano
“Ayna, ading, tagabo nak ti amerikano,
Caregiver ak ijay– tagapakan, taga-ilo!”

Tags: ilocano language, ilocano poem, immigrant poem, Mark Martinez